Ien 1931 is ien Oeldere de vastelaovesveriëniging ontstaon, mar toen nog onder de naam “de Mangelwortel”, de naam van un spaarkas toendertied. Onder andere Hannes Baten, Piet Verstappen, Wim van Rhee, Frans Verstappen, Toon Opheij en Jan Houwen I en II, han ien den tied geld gespaard um iën en ander te organisiere rondum de vastelaovend. Um de kerk ien iere te halde wiere de opbrengste geschonke an de Oelderse missionarisse, en wiere de fiëste oëgluukend toegestaon. Ien ut begin was d’r unne prins Carnaval (Prins Frans I), unne optocht mit unne prinsewage, un voetbalwedstrijd, en daor umhin nog un antal spelle. Ut gehiël wier muzikaal opgeluusterd dur muziekveriëniging “Ons genoegen”. Dit is zoë tot an den oerlog ongevèr gebleve, al wier de voetbalwedstrijd uuteindeluk un wielerwedstijd: De Ronde van de Zandhoek. Ok verplatste ut fiëst zich steeds mier naor binne, de kroeg ien.
Tiejes d’n oerlog was d’r natuurluk gen reje tot fiëst, mar daornao des te mier: D’r kwaam unne neje prins uut (prins Piet I), en den is dat gebleve tot an de vastelaovend van 1951, toen d’r iën en ander veranderde. Ien dat jaor wier d’r unne vorst uutgeroepe (Toon Opheij), unne neje prins (Louis I), en d’r vurmde zich ok un raod en bestuur. Ok wier d’r beslote dat d’r vort ieder jaor unne neje prins uut kwaam. En mit dizze neje wiend huurde ok unne neje naam: “De Spurriemök”. Spurrie is un gewas dat vroeger veul gräojde ien Oeldere en an de koewe gegove wier. En unne mök is un lid van de rundviëfamilie die bekend stöt um zien uutbundigheid.
Ien de jaore die daorop vollegde wier de veriëniging steeds mier volwasse. D’r wiere commissies gevörmd, zoëas de Bonte Aovend, de carnavalskrant, de carnavalswage, d’r kwaam un officiëel bestuur, jaorvergaderinge, un boerebrulleft, en op 15 fibbrewarie 1980 passierde de akte van de vaststelling van de statute bej de notaris. Ien de loëp der jaore is d’r uiteraard wel iën en ander veranderd. Zoë ok de lokasie: Waor hiëlemaol ien ut begin nog van kroeg naor kroeg getrokke wier, is ut uuteindeluk via de Ruif naor de Liende en den Terp gegaon, en sinds de sluuting van die lèste werre alle activiteite vort ien gemènschapshuus de Liende gehalde.
Ok qua aktiviteite wert d’r nog wel es veranderd: De boerebrulluft op den dinsdag het ien 2009 pláts gemakt vur de Buutegewoëne Binnezitting. Waor vroeger ut mökkebal op maondag was, is die verplatst naor de zaoterdag, en op de maondag is nao un antal mindere jaore vort de “Brakke Maondag”, waor we mit un aantal busse naor de optocht ien Rooj gaon, en daornao ien de Liende mit zien alle ète en fiëste.
Uuteindeluk is vastelaovesveriëniging de Spurriemök gegräojd naor wat ut nou is, en we meuge wel zegge dat we un ontzettend gezonde en enthoustiaste veriëniging hebbe. Ienmiddels is ut 8x11 jubileum alwer un antal jaore geleje, en d’r gaon nog veul jubileums gevierd werre!
